Мавзунинг долзарблиги. Миллий мустақиллик халқимиз манфаатлари йўлида мамлакат ҳаётининг барча жабҳаларида кенг кўламли туб ислоҳотларни амалга ошириш, давр талабларига монанд равишда модернизация ва инновация жараёнларини собитқадамлик билан рўёбга чиқариш имкониятини бермоқда. Ушбу ўз умумий мақсадига кўра миллий истиқлол асосларини мустаҳкамлашга қаратилган ислоҳотларнинг истиқболга йўналтирилгани жиҳатидан энг муҳим йўналиши, шубҳасиз, ёш авлод таълим-тарбияси тизимини такомиллаштиришга, мустақиллик даврида қўлга киритилган улкан ютуқларни сақлаш ва кўпайтиришга қодир шахсларни вояга етказишга қаратилган чора-тадбирларни янада қўллаб қувватлаш билан боғлиқ. Зеро, Президентимиз И.А.Каримов таъкидлаганларидек, “Биз фарзандларимизнинг фақат жисмоний ва маънавий соғлом ўсиши, балки уларнинг энг замонавий интеллектуал билимларга эга бўлган, уйғун ривожланган инсонлар бўлиб, XXI аср талабларига тўлиқ жавоб берадиган баркамол авлод бўлиб, вояга етиши учун зарур барча имконият ва шароитларни яратишни ўз олдимизга мақсад қилиб қўйганмиз”