Қуролли Кучларимизни шакллантириш жараёнида энг долзарб масалалардан бири – кадрлар масаласи эди. Мазкур муаммони ҳал этиш мақсадида ҳарбий таълим соҳаси тубдан ислоҳ қилина бошланди. Бир қатор олий ҳарбий таълим муассасалари фаолияти йўлга қўйилиб, уларда ҳарбий хизматга салоҳияти етарли, “шу азиз Ватан меники, уни кўз қорачиғимдек асраб-авайлайман, керак бўлса, ҳатто жонимни фидо қилишга ҳам тайёрман”, деган аҳди қатъий, шижоатли, мард ва жасур ҳарбий кадрлар тайёрлашга киришилди.
Тарихга назар ташлайдиган бўлсак, 1990 йилда маҳаллий кадрлар юртимиздаги ҳарбий кадрларнинг атиги 0,6 фоизинигина ташкил қилиб, ҳарбий таълим тизимини тубдан ўзгартириш, ислоҳ қилиш биринчи даражали вазифа сифатида кун тартибига қўйилган эди.
Илгари тор мутахассислар тайёрловчи билим юртлари кенг қамровли мутахассислар тайёрлайдиган ўқув муассасаларига айлантирилди, янги билим юртлари очилди, фуқаролик олий ўқув муассасалари ҳарбий кафедраларида захира офицерлари мутахассисликлари рўйхати қайта кўриб чиқилди.
Шу мақсадда 1993 йилда алоқачилар тайёрлайдиган Тошкент ахборот технологиялари университетининг Махсус факультети, 1994 йилда Жиззах олий ҳарбий авиация билим юрти, 1995 йилда Олий қўмондонлик таркиби офицерларини тайёрлаш мақсадида Қуролли Кучлар академияси, 2012 йилда эса Тошкент тиббиёт академияси ҳузуридаги Ҳарбий-тиббиёт факультети ташкил этилди. Олий ҳарбий таълим муассасалари кўп тармоқли таълим масканларига айлантирилди.