Ўзбекистон Республикаси бугунги кунда жаҳоннинг турли минтақаларидаги мамлакатлар билан кенг қамровли, яъни ижтимоий-иқтисодий, маданий ва илмий-техникавий алоқалар ўрнатишга интилмоқда. Жамият ҳаётида туб ислоҳотлар олиб борилаётган бир шароитда янги технологиялардан фойдаланиш сирларини тез ва мукаммал ўзлаштира оладиган, замонавий ишлаб чиқариш ҳамда хизмат кўрсатиш тармоқларида самарали меҳнат қила оладиган миллий кадрларга талабнинг ортиб бориши табиий ҳол.
1997 йил 29 августда Олий Мажлис томонидан “Кадрлар тайёрлаш Миллий дастури”нинг қабул қилиниши республика таълим тизимини янги ислоҳотлар босқичига кўтарди. Ёшларнинг пухта билим олиши ҳамда замонавий соҳалардан фан асосларини чуқур эгаллашлари борасида ҳукумат томонидан қатор чора тадбирлар белгиланди. Мазкур дастур талабларига кўра, таълим тарбия узвийликда олиб борилиши, уларнинг тизими ҳамда самарасини ошириш йўлида барча имкониятлардан фойдаланиш назарда тутилади.