O’zbekiston mustaqillikka erishgandan keyin qishloq xo’jaligida tubdan o’zgarishlar sodir bo’lmoqda. Yerlarni, chorvani xususiylashtirish, fermer dehqon xo’jaliklari va agrofirmalarning tashkil etilishi chorvachilikni yanada rivojlantirish yo’llarini ochib berdi. O’zbekistonda chorvachilik mahsulotlari yetishtirishni ko’paytirish va uning sifatini yaxshilash muhim vazifa hisoblanadi. Bu vazifani bajarish uchun xo’jalikda, eng avvalo, chorvachilikning ozuqa bazasi mustahkamlanishi kerak. Keyingi yillarda ko’p tarmoqli fermer xo’jaliklarining barpo etilishi bilan chovachilik ozuqa bazasini mustahkamlashga alohida e’tibor berilmoqda. Yem-xashak yetishtirish O’zbekiston qishloq xo’jaligining yirik va murakkab sohasi bo’lib, uning dolzarb muammolarini hal qilishda ozuqa tayyorlash, saqlash, qayta ishlash va foydalanishda zamonaviy texnologiyalarni yo’lga qo’yish muhim ahamiyatga ega.