Ахборот коммуникация технологиялари бозорини жадал суръатлар билан ривожлантириш Ўзбекистон иқтисодиётининг мухим йўналишларидан биридир. Ҳозирги замон тараққиётини ахборот коммуникация технологияларисиз тасаввур этиб бўлмайди. Кўплаб мамлакатлар ахборот коммуникация технологияларини тезлик билан татбиқ қилиш ва такомиллаштиришнинг улкан афзалликларини англаб етди. Билимлар ва маълумотларни етказиш ва улардан фойдаланиш билан боғлиқ бўлган иқтисодий фаолият ушбу мамлакатларнинг барқарор иқтисодий ривожланишига сабаб бўлди. Яъни билимларга асосланган янги иқтисодиёт асри бошланди.
Президент И.А.Каримов Ўзбекистон Республикаси Олий Мажлиси Қонунчилик палатаси ва Сенатининг қўшма мажлисида ахборот коммуникация технологиялари бозорини ривожлантириш масалаларига алоҳида тўхталиб, қуйидагиларни таъкидладилар: «Телерадио индустрия бозорини ривожлантириш, бу соҳада ғоялар ва дастурларнинг ижодий рақобат муҳитини вужудга келтириш бўйича аниқ чора-тадбирлар мажмуини ишлаб чиқиш ва амалга ошириш керак. Замонавий рақамли ахборот технологияларини жорий этишни жадаллаштириш зарур. Ўйлайманки, ҳозирги ахборот, коммуникация ва компьютер асрида, интернет кундан-кунга ҳаётимизнинг барча жабҳаларига тобора чуқур ва кенг кириб бораётган бир пайтда, одамларнинг онги ва тафаккури учун кураш ҳал қилувчи аҳамият касб этаётган бир вазиятда бу масалаларнинг жамиятимиз учун нақадар долзарб ва устувор бўлиб бораётгани ҳақида гапириб ўтиришга ҳожат йўқ» . Юқорида келтирилган давлатимиз раҳбари фикридан хулоса шуки, ахборот коммуникация технологияларининг ўрни замонавий бозор иқтисодиётида катта аҳамиятига эга.