Mavzuning dolzarbligi. Har qanday fanning taraqqiyoti unga xos bo`lgan analitik va sintetik tadqiqotlar nisbiy yetakchiligining tadrijiy almashinib borishidan iborat. Analitik bosqichning asosiy maqsadi o`rganish ob`yektini qismlarga ajratib o`rganish bo`lsa, sintetik talqin muayyan bosqich darajasida o`rganilgan qismlarni butunga birlashtiradi. Analitik va sintetik tadqiqotlarni keskin chegaralab bo`lmaydi. Zero, qismlar o`rganilayotganda butunga asoslaniladi, butun tadqiqotida qismlar nazarda tutiladi. Shuning uchun analitik bosqich sintetik bosqichni, sintetik bosqich analitik bosqichni doimo taqozo etadi, lekin bulardan biri muayyan tadqiqotda nisbiy yetakchilik qiladi va asosiy ilmiy maqsad unga qaratiladi. Aslida ushbu bilish yo`llari (induksiya, deduksiya) asosida qism va butunning muhim belgilari aniqlanadi hamda tadqiqot ob`yektining mohiyati bosqichma-bosqich ochilaveradi. Ushbu o`rinda muhtaram prezidentimiz Islom Karimovning quyidagi so`zlarini keltirib o`tishni o`rinli hisoblaymiz: “Milliy davlatchiligimizni qayta tiklashda, ko`p asrlik beqiyos ma’naviy merosimiz, tarix-u madaniyatimiz, din-u tilimiz va muqaddas urf-odatlarimiz yanada qad rostlashida muhim omil vazifasini bajaradi”