Respublikamiz oliy o’quv yurtlarining o’zbek filologiyasi fakultetlarida «Hozirgi o’zbek adabiy tili» asosiy o’quv predmetlaridan biri sanaladi. Namunaviy o’quv rejasiga ko’ra bu fandan ma’ruza, amaliy va seminar mashg’ulotlaridan tashqari talabalarning kurs ishlarini va mustaqil topshiriqlarni bajarishlari ham ko’zda tutilgan. Mazkur uslubiy tavsiyalarda «Hozirgi o’zbek adabiy tili» o’quv predmetining barcha bo’limlari bo’yicha bajariladigan kurs ishlari mavzulari, ularning rejalari to’la qamrab olingan, har bir mavzuni bajarish uchun zarur bo’lgan ilmiy-nazariy va o’quv-uslubiy adabiyotlar ro’yxati berilgan. Uslubiy tavsiyalarning har bir bo’limi oxirida esa «Hozirgi o’zbek adabiy tili» o’quv predmeti bo’yicha shu bo’limga oid ilmiy-uslubiy adabiyotlarning umumiy ro’yxati keltirilgan.
Mazkur uslubiy tavsiyalar kurs ishi yozadigan bakalavr talabalar hamda tilshunoslik muammolari yuzasidan ilmiy-tadqiqot ishlari olib boruvchi magistrantlar, stajyor-izlanuvchi va tadqiqotchilarga mo’ljallangan.