Ўзбекистонда давлат мустақиллиги эълон қилингандан сўнг ўтган қисқа вақт ичида ўзбек миллий давлатчилиги шаклланиб, унинг мустаҳкам қарор топиш жараёни самарали ва тез кечмоқда. Ушбу давр халқимиз олдига мустақилликни мустаҳкамлаш, инсонпарвар демократик жамият қуриш вазифасини қўйди. Тарихан ривожланган мамлакатлар жаҳон тажрибасининг кўрсатишича, суверен давлатчиликка эришиш, янги иқтисодий негизнинг шаклланиши, халқнинг ижтимоий ва маънавий жиҳатдан уйғониши собитқадам ва астойдил ҳаракат қилиш йўли билан ғоят катта қийинчиликларни енгиб ўтиш орқали амалга ошган.