Бўлажак бакалаврларнинг бадиий дидини мумтоз мусиқа воситасида шакллантириш муаммоси биринчи марта яхлит бир бутун ҳолда тадқиқ қилинди. Бўлажак мусиқа ўқитувчиларининг бадиий дидини шакллантиришда мумтоз мусиқа намуналари, мақомлар, катта ашула, йирик ҳажмдаги мумтоз ашулалардан ва халқ педагогикаси анъаналаридан кенг фойдаланилди. Шеърий матн ва мелодиянинг композицион тузилиши, улар ўртасидаги синхронлик таҳлили берилди. Педагогик амалиёт жараёнида мумтоз мусиқа орқали бўлажак мусиқа ўқитувчиларининг бадиий дидини шакллантириш масаласи биринчи марта очиб берилди. Ўзбек, шарқ халқлари ва европа мумтоз мусиқаларининг муштараклиги бўлажак мусиқа ўқитувчилари бадиий дидини шакллантиришнинг самарали услубларидан эканлиги илмий жиҳатдан асослаб берилди. Бўлажак бакалаврларнинг бадиий дидини шакллантиришнинг таснифи ва мезонлари яратилди.