Dissertasiya mavzusining asoslanishi va uning dolzarbligi: Talabalarning ilmiy-ijodiy faoliyatini tashkil etish va muvofiqlashtirish respublikamiz ta’lim muassasalari oldida turgan dolzarb muammolardan biri hisoblanadi. Bu yo`nalishdagi ishlar "Kadrlar tayyorlash Milliy dasturi"da belgilangan vazifalardan, mamlakat ijtimoiy-iqtisodiy taraqqiyotining ustivor yo`nalishlaridagi dolzarb ilmiy, ilmiy-texnikaviy muammolardan kelib chiqqan holda, tasdiqlangan me`yoriy-uslubiy hujjatlar asosida tashkil etiladi. Xususan, iqtidorli talabalarning ilmiy-ijodiy faoliyatini tashkil qilish O`zbekiston Respublikasi Oliy ta’lim vazirligining 2002-yildagi 279-sonli "Oliy o`quv yurtlarida iqtidorli talabalar bilan ishlash faoliyatini yanada takomillashtirish choralari haqida"gi hamda 2007-yil 28-fevraldagi 37-sonli "Vazirlik tizimida ilmiy-texnik kengash tashkil qilish, oliy ta’lim muassasalarida olib borilayotgan ilmiy tadqiqotlar hamda talabalar ilmiy-ijodiy faoliyatini tashkillashtirish va muvofiqlashtirish to`g`risida"gi buyruqlari, vazirlikning “Iqtidorli talabalarni izlash, aniqlash va ularni maqsadli tayyorlash to`g`risida”gi nizomi hamda tegishli xatlari va ko`rsatmalari asosida olib boriladi.