Bazar ekonomikasina o`tiw ha`m ma`mleket mu`lkin menshiklestiriw bul xojaliq ju`rgiziwdin` mazmunin,
du`zilisin ha`m psixologiyasinda sezilerli o`zgerislerge alip keledi. Bul o`z na`wbetinde, buxgalteriyaliq esapta
tu`pten o`zgerislerdi talap etedi.
Ha`zirgi zaman ekonomikasinin` rawajlanip bariwi menen investitsiyalar, sirt eller menen alip barilatug`in
finansliq ha`m xojaliq baylanislari, sawda ha`m kommertsiyaliq operatsiyalardi jetilistiriw, menshiklestiriw
protsesslerin ken`eytiriw ha`m teren`lestiriw, qimbatli qag`azlar bazari, saliqqa tartiw siyasatin ta`miyinlew
sistemasin rawajlandiriw, xojaliq baylanislarin a`melge asiriwda ma`deniyatlasqan huquq tiykarlarina tayaniw,
a`tirap do`gerektin` ekologiyasina itibardi arttiriw siyaqli ma`selelerge itibar ku`sheyip baradi.
Sonliqtan finansliq esapti du`n`ya standartlarina sa`ykes tu`rde ju`rgiziw ha`zirgi waqitta u`lken a`hmiyetke
iye bolmaqta. Sebebi bazar qatnasiqlarinin` rawajlaniwi menen bizin` Respublikamizda sirt eller menen birgelikte
islesiw ushin ashilip atirg`an «Qospa ka`rxanalar» rawajlana basladi. Sonin` ushin finansliq esapti zaman talabina
say ju`rgiziwdi da`wirdin` o`zi talap etpekte.