X.Turımbetov do’retiwshiliginde lirikalıq syujet

Ko’rkem a’debiyattın’ barlıq janrları ishinde lirika o’zinin’ na’zikligi, ko’rkemligi, sezimtallıg’ı, o’tkirligi menen ayrıqshalanıp kelmekte. A’sirese poeziyası ku’shli rawajlang’an bizin’ qaraqalpaq xalqının’ ruwxıy du’nyasında, ma’deniyatında lirikanın’ tutatug’ın ornı joqarı ekenligi so’zsiz. Lirikanın’ ja’ne bir o’zgesheligi ol a’debiyattın’ basqa janrlarına qarag’anda da ja’miyettin’ ruwxın o’zine ko’birek sin’irip onı ayqınraq sa’wlelendiredi. Usı ko’z qarastan bah’alag’anda qaraqalpaq lirikası o’zine ta’n rawajlanıw o’zgesheliklerine iye boladı.