Bozor munosabatlari rivojlanishi davomida texnologik jihatdan murakkab, yirik kapital talab etuvchi mahsulotlarni ixtiro qilish, ishlab chiqarish va sotish borasida integratsiya darajasining o`sishi xalqaro tendensiyaga aylanib borayotgan sharoitda iqtisodiy muammolarni hal qilish tobora murakkablashib bormoqda. Xalqaro iqtisodiy integratsiyalashuv sharoitida yangi ko`pgina ob`yektiv omillar ta`siri ostida biznesning tuzilishi murakkablashib, uni ko`plab yuridik shaxslarga bo`lish, alohida yuridik shaxslar va xoldinglar darajasidagi tarkibiy tuzilmalarining ko`pgina sonini shakllantirish zarurati yuzaga keldi. Iqtisodiyotning xalqaro globallashuvi bilan bog`liq holda raqobat kuchayishi, mahsulot sifati va raqobatdoshligiga ilmiy-texnik va innovatsion-marketing jarayonlarining tezkor ta`siri kuzatilmoqda. Respublikamizda ham milliy iqtisodiyotni liberalizatsiyasi bilan bog`liq holda korxonalarning roli ortib bormoqda.