Mumtoz hind adabiyoti tarixi bo`yicha tayyorlangan ushbu o`quv qo`llanma Sharqshunoslik Oliygohining bakalavriat guruxlari hamda Sharqshunoslik akademlitseyi yuqori kurs talabalari uchun mo`ljallangan bo`lib, unda asosan hind adabiyotining qadimdan to kech o`rta asrgacha (XVII asrgacha) bo`lgan davr adabiyotining rivojlanish tarixi o`rganiladi.
Hind adabiyoti qadimiy adabiyotlar sirasiga kirib uning tarixi eramizdan oldingi to`rtinchi ming yilliklardan boshlanadi. O`quv qo`llanmani tayyorlashda muallif hind adabiyotshunoslari, rus va o`zbek sharqshunoslarining ilmiy izlanishlari, ilmiy asar va maqolalariga tayangan. Ushbu qo`llanma yordamida talaba asosan hind adabiyotining eng dastlabki yozma yodgorliklari, qadimda shakllangan adabiyotning turli yo`nalishlari, shoir va yozuvchilari, hamda hind diniy-falsafiy qarashlarining adabiyotga ta’siri kabi masalalar bo`yicha tushuncha va mahsus ilm hosil qiladi.