Кўчманчи чорвадор ва ярим ўтроқ турмуш тарзли элларнинг оилалари катта патриархал оила бўлиб яъни, бир тўпда жамланиб, тўплари уруққа, уруғлари элга бирлашиб, «Бирлашган ўзар, бирлашмаган тўзар» қоидасига амал қилиб яшашга зарурат сезган, бошқача айтганда, уларнинг чорва хўжалиги жамоа бўлиб яшашликни таққозо этган. Ташқи ёв қаршисида эл ҳам заифлик қила бошлагач, икки эл бир элатга (улусга) бирлашиб ва улус таркибига шаҳар, қишлоқларнинг ўтроқ аҳолисини ҳам қўшиб олиб, қардошлик жамиятига айланган. Эл оғзидаги «Элга эл қўшилса давлат, улусдан эл кўчса меҳнат» деган нақл ҳам балки шунга яъни, кўчманчи чорвадор туркий элларда давлатчиликнинг келиб чиқишига бир рамзий ишорадир.