Nuriddin Boboxo`jayev asarlarida inson ruhiyati tasviri haqida.Nuriddin Boboxo`jayev ijodida Namanganni ko`p bora ulug’lash bejiz emas edi. U yosh avlodda avvalo tug’ilib o`sgan zaminga, ona qishlog’i, shahri, viloyatiga nisbatan mehr uyg’otishni ko`zlagan edi. Ana shu mehr zamirida butun Vatanga bo`lgan mehr shakllanib borishi shubhasizdir. Bu borada Prezidentimiz Islom Karimovning quyidagi so`zlari naqadar to`g’ri ekanligi o`tgan yilar ko`rsatib turibdi: “Biz farzandlarimiz yuragida ona Vatanga, boy tariximizga, ota-bobolarimizning muqaddas diniga sog’lom munosabatni qaror toptirishimiz, ta`bir joiz bo`lsa, ularning mafkuraviy immunitetini kuchaytirishimiz zarur” .
Nuriddin Boboxo`jayevning adabiy merosining badiiy qimmati darajasi qanday bo`lishidan qat`iy nazar, uning o`tgan asrning 60-80 yillarida Namangan adabiy muhitida tutgan o`rni salmoqli bo`lganligi sababli o`rganishga loyiqdir. Nuriddin Boboxo`jayev ezgulikni, insonparvarlikni, ilm o`rganishni, Vatan oldidagi burchni anglay ola bilishni targ’ib etgan ijodkor ekani biz uchun juda-juda muhimdir. Yurtboshimiz ta`kidlaganlaridek: “O`z tarixi va ajdodlarini siylagan xalqning kelajagi albatta porloq bo`ladi” .