Turk xalq maqollarini sematikasini o’rganish.Ushbu bitiruv-malakaviy ishi hozirgi zamon turk tilidagi maqollarni ilmiy o`rganishga bag`ishlangan. Zero bu mavzu har doim turk tilshunosligining eng muhim va dolzarb muammolaridan biri bo`lib kelmoqda. XX asrda turk maqollarining tadqiq etilishi bo`yicha yirik ishlar amalga oshirilgan. Ammo, shunga qaramay, maqollar bilan bog`liq barcha masalalar o`rganib bo`lingan deyish mumkin emas. Shu bois biz tanlagan BMIning mavzusi dolzarb hisoblanadi.
Xalq maqollarni yaxshi ko`radi: ularda dunyoning hikmati, donishmandligi mujassam. Maqollar purma’noligi bilan nutqimizni bezaydi, kundalik hayotimizning ajralmas bir bo`lagiga aylanib qolgan. Balki shuning uchundir fan uchun qiziqarli bo`lgan xalq so`zlari muhim qimmatga ega. Haqiqiy ilm insonlar uchun kerak bo`lgan, hayotiy narsalarni o`rganadi. Mazkur ish umuman turk xalqi, uning dunyoqarashi, faoliyati, hayoti bilan qiziquvchi insonlarda katta qiziqish uyg`otadi. Shu bilan birga, turk maqollari va matallarini bilish tilni boyitadi, turk tilining obrazli (badiiy) qurilishini o`zlashtirishga yordam beradi, xotirani mustahkamlaydi, xalq donishmandligiga oshno qiladi. Qisqa, obrazli, tugallangan ma’no ifodalovchi lo`nda gaplarni, odatda, eslab qolish ham oson bo`ladi.