Мавзунинг долзарблиги. Мустақиллик йиллари мобайнида жамиятда шундай ижтимоий-иқтисодий ва сиёсий муҳит, қадриятлар юзага келдики, улар шахснинг, айниқса, ёш авлоднинг ўзини ўзи англаш, ўзини ўзи назорат қилиш ва шу хусусиятлар билан узвий боғлиқ бўлган таълимнинг ривожланиши, унга нисбатан муносабат ўзгариши учун объектив шарт шароитлар яратди.Шахсда ўзини ўзи назорат қилишнинг шаклланиши муаммоси хориж психологлари ва педагоглари томонидан кенг кўламда тадқиқ қилиб келинган. Жумладан, ўзини ўзи назорат қилишнинг тузилиши, ривожланиш даражаси, шахс хусусиятлари ва бошқа жараёнлар билан ўзаро алоқаси (М.И.Боришевский, В.В.Давидов, Л.Б.Ительсон, А.Н.Леонтьев, И.Н.Марголин, А.К.Маркова, В.И.Страхов, А.Я.Савченко, Д.Б.Эльконин ва бошқалар), ўзини ўзи назорат қилишнинг мазмуни (Т.И.Гавакова, А.И.Липкина, К.А.Мальцева, Г.А.Собиева, А.К.Сердюк, С.П.Тишенко ва бошқалар), хулқ-атвор ва фаолиятнинг ҳар хил турларида ўзини ўзи назорат қилишнинг ўрни ва функциялари (П.Я.Гальперин, В.В.Давидов, А.К.Маркова, А.В.Захарова В.Г.Романко, В.В.Репкин, Л.Б.Ительсон, Н.И.Кувшинов, Д.О.Оганесян, Л.Г.Подоляк, И.В.Страхов, Б.А.Федоришин, М.И.Боришевский), ўзини ўзи назорат қилишнинг ёш ва индивидуал-психологик хусусиятларга боғлиқлиги (Е.А.Бугрименко, Т.И.Гавакова, Н.С.Лейтес, А.И.Липкина, К.Н.Поливанова, С.П.Тишенко ва бошқалар) ўрганилган бўлиб, бу соҳада кўплаб маълумотлар тўпланган.