Мавзунинг долзарблиги. Республикамиз мустақилликка эришганидан сўнг сиёсат ва маънавиятда юз берган муҳим ўзгаришлардан бири тарихимизга бўлган муносабатнинг тубдан ўзгаришидир. Президентимиз И.А.Каримов айтганидек, «Бизнинг қадимий ва бой тарихимизни, улуғ аждодларимиз ва улар қолдирган беқиёс маданий мерос башарият маданияти ривожига улкан ҳисса бўлиб қўшилганини бутун жаҳон билади» . Халқимизнинг ўзига хос маънавий бойлиги тарихий меросимизда ўз ифодасини топганлигини эътиборга олсак, бу меросни ўрганиш, уни ҳар томонлама тўғри, холис ёритиб бериш тадқиқотчилар ва олимлар олдида турган энг зарур вазифалардан эканлиги маълум бўлади. Бу вазифани амалга оширишни эса ўрта асрларга оид ёзма манбаларсиз тасаввур қилиш мумкин эмас.