Сифатли дори воситалар (ДВ) беморларни хавфсиз даволаш асосидир. Маълумки, ДВ хавфсизлиги ундан фойдаланилганда ножўя таъсирларининг йўқлиги билан, унинг самараси эса таъсир қиладиган модданинг энг кам дозасидан фойдаланганда эришиладиган фармакотерапевтик таъсир даражаси билан белгиланади. Халқаро Соғлиқни Сақлаш Ташкилоти доирасидаги (Уппсала шахри, 2005 йилнинг сентябридан Ўзбекистон хам аъзо бўлди) ножўя таъсирлар мониторинги бўйича халқаро марказ маълумотларига мувофиқ, 2-3% одамлар ДВ ножўя таъсирлардан зарар кўрмоқда. Дунёдаги 30 млн.дан ортиқ одам ҳар куни ностероид яллиғланишга қарши воситалар (НЯҚВ) қабул қилишмоқда, булардан 40%и 60 ёшдан ошган, 20% эса стационар беморлардир. Шунингдек, булар рецептсиз препаратлар қаторига кирганлиги сабабли назоратсиз қулланади. НЯҚВдан эффектив дозаларда узоқ муддат фойдаланиш турли хил асоратларга олиб келиши мумкин.