Мавзунинг долзарблиги. Республикамиз Президенти И.А.Каримов Ўзбекистон Республикаси Фанлар академиясининг умумий йиғилишида сўзлаган нутқида шундай деган эди: «Тилшунослик соҳасидаги илмий изланишлар, авваламбор, ўзбек тилига давлат тили мақомининг берилиши ва унинг қўлланиш соҳасининг анча кенгайтирилгани, халқаро муносабатларда ишлатиладиган тиллар қаторига киритилиши кейинги йилларнинг бу борадаги улкан ютуғидир» .
Ўзбек тилшунослигида кейинги йилларда ўзбек тилининг ўзига хос тизимли тузилишга эга эканлиги теран илмий изланишлар туфайли тобора аниқроқ исботлаб борилмоқда. Ўзбек тили бирликларининг нутқда қўлланиш имкониятларини тўла очиб бериш, ҳар бир гуруҳга кирувчи сўзларнинг барча хусусиятларини ўрганиш борасида кенг кўламли ишлар бошлаб юборилганлиги қувонарли. Бироқ тилшунослигимизда ҳалигача ўз ечимини топмаган муаммолар ҳам бир қанча. Ўзбек тили сўзларининг мазмуний полифункционаллиги, уларнинг нутқ жараёнидаги вазифаларини аниқлаш шундай муҳим муаммолардан биридир. Тўғри, ўзбек тилига оид дарслик ва қўлланмаларнинг сўз туркумлари ўрганилган бобларида сўзларнинг турли хил синтактик вазифаларни бажариб келиши таъкидланади. Бироқ сўзларнинг полифункционаллиги, морфосинтактик, идеоматик табиати хусусида батафсилроқ фикр билдирилган, дея олмаймиз.