Мавзунинг долзарблиги. Пахтачиликда бугунги кундаги энг долзарб вазифалардан бири бу минтақа тупроқ-иқлим шароитларига мос, шўрга чидамли, эртапишар, касаллик ва зараркунандаларга бардошли, серҳосил, тола сифати жаҳон андозалари талабларига жавоб берадиган янги ғўза навларини яратишдир. Ғўзанинг бутун вегетация даври бир қанча омиллар, жумладан, об-ҳаво ва тупроқ-иқлим шароити, турли касаллик ва зараркунандалар таъсири остида ўтади. Шўрланган тупроқ шароитида ғўза ва бошқа маданий экинларнинг ўсиши, улардаги моддалар алмашинуви ҳамда бошқа жараёнларнинг пасайиши олинадиган маҳсулотнинг сифатига ҳам салбий таъсир этади. Чунки, тупроқда турли биокимёвий жараёнлар туфайли рўй берадиган ўзгаришлар ҳисобига ўсимликнинг озиқланиши қийинлашади. Шўр тупроқда ўсимлик илдизи тоза тупроқдагига нисбатан бирмунча кам ривожланади, чунки тупроқдаги эритма босими 2-3 атмосфера ўрнига 10-20 ва ундан ҳам ошиб кетиб, минерал озуқаларни ўзлаштириш секинлашади. Шўрланган майдонлар учун шўрга чидамли бўлган ғўза навларини яратиш, мелиорация ишларини сифатли тарзда ўтказиш нафақат ҳосилдорликни оширади, балки ҳосил сифатини ҳам яхшилайди.