Tibbiy kimyo (bioanorganik kimyo) fani asosan biologiya, biokimyo va anorganik kimyo fanlarining negizida vujudga kelgan eng yangi fanlardan biridir. Bu fanning asosiy vazifasi, anorganik ionlarning ishtirokida, tirik xujayralarda boradigan turli biokimyoviy reaktsiyalarning yo`nalishlarini ularning tezliklarini hamda organizmdagi ahamiyatiyai o`rganishdan iboratdir. Bulardan tashqari tirik organizmda sodir bo`ladigan jarayonlarni kimyoviy nuqtai nazardan o`rganish, jarayonlarning o`ziga xos tomonlarining komponentlar xossasiga bog`liqligini o`rganish, biologik faol moddalar, shu jumladan metall ioni saqlovchi biokomponentlarning tuzilishini aniqlash va ularni modellashtirish kabi qator misollarni keltirish mumkin. Bu misollarni atroflicha o`rganish odam organizmida mavjud bo`lgan va hayotiy ahamiyatga ega bo`lgan jarayonlarni tahlil qilish, ularning sog`lom va xastalikka chalingan organlarda amalga oshishi orasidagi farqlarni aniqlash hamda zarur hollarda ularni mutanosiblashtiruvchi davolash uslublarini yaratishga asos bo`ladi.