Миллий истиқлол туфайли Ватан ва халқ, давлатчилик тарихи, бадиий маданият ва санъат тарихи, миллий қадриятлар, урф-одатлар ижро ва талқинларда асл ҳолатида қайта тиклана бошлади. Вужудга келган ижодий эркинлик, тазйиқ ва таъқиблардан халос бўлиш натижасида ўзбек театрида ҳам янгиланиш, ўзгаришлар юз бера бошлади, ижодий-услубий изланишлар олиб борилмоқда. Саҳна ижодкорларининг янгича фикрлайдиган ёш авлоди майдонга келди.
Театр санъатида ҳам мавзу, жанр, услублар ранг-баранглиги, томошабин учун эса танлаш имконияти пайдо бўлмоқда. Театр жамоалари ўзаро ижодий тортишадиган, рақобатбардош спектакллар яратишга астойдил киришадиган давр келди. Мана шу асосда ҳар бир театрнинг ўз томошабини шаклланади. Энди театр томошабиннинг кетидан эмас, аксинча, томошабин театр ортидан эргашиши зарур.