Ximiya – tabiatni o`rganuvchi fanlardan biridir. Tabiatdagi narsa va hodisalar turli-tuman bo`lganligi bilan ular o`rtasida birlik bor. Bu birlik ularning moddiyligidadir. Olam materiyadan iborat. Biz ko`rib turgan, sezadigan jamiki atrofimizdagi narsalar materiyaning formalaridir. Materiya doim harakatda. Harakat va materiya doim ajralmasdir. Jismlarning qizishi va sovishi, nur sochishi, elektr toki, ximiyaviy o`zgarishlar, hayotiy prosesslar, fikr qilishlar-bular hammasi materiya harakatining turlaridir. Materiya harakatining ayrim turlarini alohida-alohida fanlar-fizika, ximiya, biologiya va boshqalar tekshiradi.