Мавзунинг долзарблиги. Ҳозирги жаҳон молиявий-иқтисодий инқирози шароитида банк тизимини қўллаб-қувватлаш, ишлаб чиқаришни модернизация қилиш, техник янгилаш ва диверсификация қилиш, инновацион технологияларни кенг жорий этиш Ўзбекистон учун инқирозни бартараф этиш ва жаҳон бозорида янги марраларга чиқишнинг ишончли йўлидир.
Республикамиз Президенти И.Каримов Олий Мажлис Қонунчилик палатаси ва Сенатининг қўшма мажлисидаги маърузаларида “Олий Мажлиснинг қонун ижодкорлиги фаолиятида мамлакатимизда иқтисодий соҳада амалга оширилаётган таркибий ўзгаришларни, қулай инвестицион муҳитни шакллантириш, ишлаб чиқаришни модернизация қилиш ва техник қайта жиҳозлаш, банк-молия тизимини ривожлантиришни норматив-ҳуқуқий жиҳатдан таъминлаш масалалари алоҳида ўрин эгаллади” деб таъкидлади.
Шунга кўра республикамиз қишлоқ хўжалиги, жумладан ғаллачиликда, янги ва такомиллашган техника воситалари ҳамда машиналарни қўллаш харажатларни камайтириш ва иш сифатини ошириш имконини беради.
Сўнги йилларда ғаллачиликни ривожлантиришга жиддий эътибор қаратилганлиги туфайли Ўзбекистонда ғалла етиштириш муттасил ошиб бормоқда.