Мавзунинг долзарблиги. Республика соғлиқни сақлаш тизимининг асосий вазифаларидан бири аҳолини самарали, кам заҳарли, хавфсиз ва юқори фармакологик фаолликга эга бўлган дори воситалари билан таъминлашдир. Ўзбекистонда табиий фитопрепаратларни ишлаб чиқиш учун доривор ўсимлик хом ашёлари заҳиралари етарли, ушбу холат бугунги кундаги импорт ўрнини босувчи дори воситалари яратиш бўйича дастурнинг талабларига мувофиқ махаллий дори препаратларини ишлаб чиқариш ва татбиқ этиш имконини беради. Доривор ўсимликларнинг кенг фармакологик таъсир спектри улар таркибидаги биологик фаол моддаларга (БФМ) боғлиқдир.
Грек ёнғоғининг шифобахш хоссалари қадимдан маълум бўлиб, халқ табобатида кенг қўлланилади. Грек ёнғоғи таркибидаги комплекс БФМнинг ўсмаларга, бактерия ва замбуруғларга қарши хусусиятлари, Гиппократ ва Ибн Синолар давридаёқ маълум бўлган. Лекин грек ёнғоғининг таркиби ва компонентларининг токсикологик хоссалари чуқур ўрганилмаганлиги сабабли, унинг асосида олинадиган препаратлар амалиётга татбиқ этилмаган ва саноат миқёсида ишлаб чиқарилмайди. Олиб борилган илмий тадқиқотлар грек ёнғоғи асосида тайёрланган фитопрепаратларнинг амалий тиббиётга татбиқ қилинишини тақозо этади.