Мавзунинг долзарблиги. Хўжалик юритишнинг барча тармоқларида меҳнат, энергия, хом-ашё ва материаллар, жиҳозлар ва ишлаб чиқариш қувватларидан тўла фойдаланиш, турли нобудгарчилик ва чиқиндиларни камайтириш, ноишлаб чиқариш харажатларини бартараф этиш каби мавжуд ресурслардан унумли фойдаланишга қаратилган тадбирларни амалга ошириш Ўзбекистон Республикаси халқ хўжалигини иқтисодий ва ижтимоий ривожлантиришнинг асосий йўналишларидан бири ҳисобланади.
Республикамизнинг хўжалик юритиш тизимида қишлоқ хўжалиги муҳим ўринни эгаллайди. Шунинг учун қишлоқ хўжалик ишлаб чиқаришини ривожлантириш мақсадида давлатимиз томонидан самарали ислоҳотлар ўтказиб келинмоқда. Деҳқонларнинг мулкчилик муносабатлари ўзгариб, уларнинг мавжуд ишлаб чиқариш қуроллари ва техникаларидан самарали фойдаланишга бўлган талаби янада ортмоқда. Ортиб бораётган талабларни қондириш учун эса машиналарнинг техник ҳолати, пухталиги ва ресурсини ошириш зарур бўлади.
Барча деталларининг пухталиги ва ресурси каби кўрсаткичларининг бир хил эмаслиги, ҳавонинг юқори чангланганлиги, деталларнинг тупроқ билан тўғридан-тўғри контактда бўлиши, уларга доимий ва тўлақонли хизмат кўрсатишнинг қийинлиги каби сабаблар қишлоқ хўжалик ва мелиорация техникалари учун таъмирлаш талабини вужудга келтиради.