Ҳар қандай давлат ташкил топиш ва тараққий этиш жараёнида ўз фаолиятининг асосий йўналишларини белгилаб олиши табиий ҳолдир. Ўзбекистон мустақилликка эришгач, ўз олдига мамлакатда ҳуқуқий демократик давлат қуриш ва эркин фуқаролик жамиятини шакллантиришни бош мақсад қилиб қўйди. Ўзбекистон Республикаси Президенти И. А. Каримов таъкидлаганидек, “асосий вазифа – ислоҳотларни давом эттириш ва чуқурлаштириш, мамлакатимизни янгилаш ва модернизация қилиш, 2009–2012 йилларга мўлжалланган Инқирозга қарши чоралар дастурини сўзсиз бажариш ва шу асосда иқтисодий ривожланишнинг юқори ва барқарор суратларини, самарадорлигини ҳамда макроиқтисодий мувозанатни таъминлашдир” . Мазкур устувор вазифадан келиб чиқиб, жамиятни демократлаштириш ва модернизация қилиш ҳамда жаҳон молиявий-иқтисодий инқирозини бартараф этиш баробарида, давлатнинг функцияларини теран илмий-назарий тадқиқ этиш долзарб масалалардан бири эканлиги шубҳасиздир.