Қоракўлчилик чорвачиликнинг чўл ҳудудларида ривожланадиган муҳим тармоқларидан бири бўлиб, унинг асосини ташкил этувчи қоракўл қўй зоти етиштирилувчи мўйнабоп қоракўл терилари ранг ва рангбарангликларининг, гуллар ҳамда жун-тола қоплами сифат кўрсаткичларининг хилма-хиллиги бўйича тенгсиз ҳисобланади. Зот таркибида 10 дан ортиқ ранглар мавжуд ва уларнинг аксариятини қора (60%), сур (30%) ва кўк (8%) рангли қоракўл қўйлари ташкил этади.
Бухоро зот типига мансуб сур қоракўл қўйлари зотнинг энг қимматли ранг гуруҳларидан бири бўлиб, ушбу рангдаги қоракўл маҳсулотига ички ва ташқи бозорда талаб юқори. Шу нуқтаи назардан ушбу ранг қўйлар салоҳиятидан унумли фойдаланиш, олинадиган маҳсулот сифатини яхшилаш ва ассортиментини кенгайтириш долзарб муаммолардан биридир.