Iqtisodiyot nazariyasi fanining predmeti va uslubi

O’zbekiston Respublikasi Mustaqillikni qo’lga kiritgan dastlabki kunlardanoq bozor iqtisodiyoti yo’lini tanladi va u tomon shahdam qadam tashlamoqda. Mamlakatda olib borilayotgan bozor islohotlari iqtisodiy-ijtimoiy taraqqiyotda yangi davrni ochdi. Bu davrning maqsadi sivilizatsiyalashgan bozor iqtisodiyotiga asoslanuvchi demokratik, huquqiy va adolatli jamiyat qurishdir. Islohotlar xalqimizning ongi va ruhiyatida ham yangicha dunyoqarashni shakllantirmoqda. Ayniqsa, yoshlarimiz orasida yangicha fikrlash, bozor iqtisodiyotini idrok etish, ishlash va yashashga intilish qaror topmoqda. Boqimandalik kayfiyatining o’rnini ishchanlik, ishbilarmonlik ruhiyati egallamoqda. Ular orasida iqtisodiy bilimlarga qiziqish kuchaymoqda. Maqsadimiz yoshlarni malakali mutaxassis egasi sifatida iqtisodiyotning qonun - qoidalari va sir asrorlarini chuqur bilishga o’rgatishdir. Iqtisodiyot nazariyasi fani fundamental fan sifatida iqtisodiy hayotning mazmun mohiyatini, uni boshqarishning qonunlarini va ulardan foydalanish yo`llarini o’rgatadi. Ushbu ma’ruzalar matnini tuzishda O’zbekiston Respublikasining "Kadrlar tayyorlash milliy dasturi" va «Ta’lim to’grisida»gi qonuni asos qilib olindi. SHuningdek, biz bozor iqtisodiyotiga kirib kelayotganimizni, bu sharoitda yashashimiz, faoliyat ko’rsatishimiz, xilma-xil munоsаbatlarda bo’lishimizni hisobga olib, bozor iqtisodiyoti muammolarini, uning qonun-qoidalarini, tushunchalarini, ularning hayotimizda qay darajada, qay shaklda amal qilayotganini yoritishga harakat qildik.