Талабаларнинг йил давомида ботаника фанидан олган билимларини мустаҳкамлаш, ўсимликлар морфологиясини, систематикасини ва геоботаника асосларини чуқурроқ ўрганиш мақсадида ёзги ўқув дала амалиёти машғулотлари ўтказилади. Ботаникадан ўтказиладиган ўқув-дала амалиёти давомида талабалар ўсимликлар қоплами билан яқиндан танишадилар. Шунингдек улар ёввойи ва маданий ўсимликларнинг маълум хўжалик аҳамиятига эга эканлиги, улардан қимматбаҳо доривор, ем-хашак ва техник ўсимлик сифатида фойдаланишни илмий асосда амалга ошириш мумкинлигига ишонч ҳосил қиладилар. Ўсимликларнинг номини аниқлашда аниқлагичдан фойдаланиш йўлларини тўла ўзлаштирадилар.