Мавзунинг долзарблиги. Республикамизда чорвачиликни фермерлик
асосида ривожлантиришга қаратилган иқтисодий ислоҳатларнинг амалга
ошишида, хусусан, Ўзбекистон Республикаси Президентининг 2006 йил 23
мартдаги «Шахсий ёрдамчи, деҳқон ва фермер хўжаликларида чорва
молларни кўпайтиришни рағбатлантириш чора-тадбирлари тўғрисида»ги
ПҚ-308 – сонли, 2008 йил 21 апрелдаги «Шахсий ёрдамчи, деҳқон ва фермер
хўжаликларида чорва моллар кўпайтиришни рағбатлантиришни кучайтириш
ҳамда чорвачилик маҳсулотлари ишлаб чиқаришни кенгайтириш борасидаги
қўшимча чора-тадбирлар тўғрисида»ги ПҚ-842 – сонли қарорларининг
бажарилишини таъминлаш, ички бозорни ҳаётий зарур озиқ-овқат
маҳсулотлари ва шу жумладан, чорвачилик маҳсулотлари билан барқарор
тўлдиришда қишлоқ хўжалик ҳайвонларининг қатор касалликлари, айниқса,
жигар дистрофияси касаллиги катта тўсиқлардан бири бўлиб қолмоқда.
Шу боисдан Республикамизнинг фермер хўжаликлари шароитидаги
соғин сигирларда жигар дистрофиясининг сабабларини аниқлаш, эртачи
ташхис усуллари ҳамда даволаш ва олдини олиш тадбирларини ишлаб
чиқишга қаратилган илмий тадқиқотларни ўтказиш ҳозирги кун ветеринария
фани ва амалиёти олдида турган муҳим вазифалардан бири бўлиб
ҳисобланади.