Бугунги кунда Ўзбекистон Республикасида ҳуқуқий демократик давлат ва фуқаролик жамиятини барпо этиш, суд-ҳуқуқ соҳасидаги ислоҳотларни амалга ошириш шароитида фуқароларнинг ҳуқуқ ва эркинликларини ҳамда қонуний манфаатларини таъминлаш, жиноий жазолар тизимини либераллаштириш ўз навбатида юридик жавобгарликдан озод қилиш масаласига ҳам алоҳида эътибор беришни талаб этмоқда. Ўзбекистон Республикаси Президенти И.А.Каримов таъкидлаганидек, «оғир жазо, айниқса, фуқароларни жамиятдан ажратиш билан боғлиқ бўлган жазоларнинг жиноятчиликнинг олдини олишдаги аҳамиятини ошириб кўрсатиш ўринсиз эканлигини ҳаётнинг ўзи исботламоқда.
Жиноятчиликнинг олдини олиш унга қарши кураш самарадорлиги жазонинг оғирлиги ва шафқатсизлигига эмас, балки биринчи навбатда қоидани бузган шахснинг жазонинг муқаррарлигини нечоғли англашига боғлиқ» .
Содир этилган ҳуқуқбузарлик учун жавобгарликнинг муқаррарлиги принципи узоқ вақтлардан бери юридик фан ва амалиётнинг тамал тошларидан бири бўлиб келмоқда. Маълумки, давлат бошқаруви жараёнида ўз ҳуқуқлари, эркинликлари ҳамда фаолиятини амалга ошираётган юридик ва жисмоний шахслар билан давлат органлари ва мансабдор шахслар ўртасида доимий муносабат юзага келади. Фуқаролар ва давлат муайян ҳуқуқ ва бурчлари билан ўзаро боғлиқ эканликлари Асосий қонунимизда ҳам ўз ифодасини топган. «Инсон ва давлат ўртасидаги муносабатларда инсон манфаатлари устувор бўлиши керак. Давлат ва давлат ҳокимиятининг барча тармоқлари ўз фаолиятини инсон ҳуқуқларини ҳимоя қилиш ва қўриқлаш ишига сафарбар қилгандагина ўз вазифасини тўғри адо этган ҳисобланади» .
Мана шу концептуал ғоядан келиб чиқиб, ҳозирги кунда юридик жавобгарликдан озод қилишнинг мустаҳкам тизимини яратиш масаласига давлат ва ҳуқуқ назарияси фани нуқтаи назаридан баҳо бериш алоҳида аҳамият касб этади.