Ўзбекистон Республикаси Конституциясида эълон қилинган демократик ҳуқуқий давлатни шакллантиришга, шак-шубҳасиз, қонунчилик ҳокимиятининг асоси сифатида самарали ишлайдиган профессионал парламент ташкил этиш ва унинг фаолият кўрсатиши баробарида эришилади. Ҳуқуқ ижодкорлиги ҳозирги замон шарт-шароитларида мутлақо янги концептуал асосларга таянишини англаб етиш давлат ва жамиятдан янги парламент ташкил этиш, қонун ижодкорлиги фаолиятини ислоҳ қилиш ва такомиллаштириш борасида улкан саъй-ҳаракатларни талаб қилди.
Ҳокимиятнинг тармоқларга бўлиниши принципи Ўзбекистон Республикасида давлат ҳокимиятини амалга оширишнинг асосий принципларидан биридир. Шу принцип мустақиллик йилларида қонун ижодкорлиги фаолиятини ислоҳ қилишга таъсир кўрсатган жиддий омиллардан бирига айланди.
Қонун ижодкорлиги фаолияти конституцион даражада ҳам, амалдаги қонунлар даражасида ҳам ўзининг мустаҳкам ҳуқуқий негизига эга бўлди.
Буларнинг ҳаммаси қонун ижодкорлиги жараёнининг моҳияти ва мазмунини жиддий назарий тадқиқ этиш заруриятини келтириб чиқарди. Қонунчилик жараёнини ўрганишга бағишланган кўплаб илмий ишлар пайдо бўлди1. Уларнинг барчасида парламент ичидаги қонун ижодкорлиги жараёнига алоҳида эътибор қаратилди. Бироқ, қонунчилик жараёнининг ҳар қандай босқичи ҳуқуқ ижодкорлиги фаолиятининг муҳим элементи бўлиб, у давлат ҳокимияти тармоқлари ўртасидаги ўзаро ҳамжиҳатликни ва конституциявий ҳуқуқий муносабатларни рўёбга чиқаришни ўз ичига олади.