Ma’lumki, funksiya tushunchasi matematik tahlilning asosiy tushunchalaridan biridir. Shunga ko’ra funksiyalarni o’rganishda (tekshirishda), ularni tasniflash (sinflarga ajratish) avvalo funksiyalarning muhim xossalari orqali amalga oshirilishini nazarda tutadigan bo’lsak, ikkinchi tomondan bu ish bizga funksiyalarni yanada chuqurroq o’rganish imkonini beradi va qolaversa ayrim hollarda funksiyani tekshirish uchun sarflanadigan vaqtni kamaytiradi. Bu holatni biz funksiyalarning muhim bir sinfini tashkil qiluvchi – juft va toq funksiyalar sinfida kuzatishimiz mumkin. Bu sinfga kirgan funkiyalar uchun muhim shart, avvalo funksiyaning aniqlanish sohasini koordinatalar boshiga nisbatan simmetrikligi bo’lsa, ikkinchi shart funksiyaning aniqlanish sohasidan olingan simmetrik nuqtalardagi qiymatlari orasidagi munosabatdir. Endi juft va toq funksiyalarning “geometrik” va “analitik” ta’riflarini eslatib o’taylik.