Маълумки, кейинги пайтда жаҳон оммавий ахборот воситаларида дунёнинг кўпгина минтақаларида юз бераётган ипотека кредити билан боғлиқ молиявий танглик хусусида ташвиш билан сўз юритилмоқда. Дастлаб Америка Қўшма Штатлари иқтисодиётида кўзга ташланган бу ҳолат кўп ўтмай Европанинг бир қатор давлатларида, кейинчалик Осиёдаги Покистон мамлакатида ҳам намоён бўла бошлади. Хориждаги бу иқтисодий инқироз қандай юз берганлиги ва унинг сабаблари тўғрисида фикр юритадиган бўлсак, ўтган асрнинг 90-йиллари охирларида АҚШда қабул қилинган бир қатор қарорларни кўздан кечириш зарур. 1999 йили ҳукумат томонидан уй-жойлар учун ипотека кредити бериш билан шуғулланадиган агентликларга қарз олиш чоғида қўйиладиган талабларни камайтиришга рухсат этилган эди. 2001 йили эса ипотека кредитларининг устама фоизи энг кам миқдоргача пасайтирилди. Натижада, айрим устамон кишилар учун осонлик билан бойлик орттиришга, яъни сотиб олиб, бир-икки йилдан кейин қиммат баҳода пуллашга шарт-шароит вужудга келди. Кредит беришда қарз олувчининг даромади ҳақида тегишли маълумотномани талаб қилмаслик тамойилга кириб қолганлиги уларга жуда қўл келди.