Жоқары оқыў орынларының филология факультетлеринде тил ҳаққындағы илимниң тийкарлары менен студентлерди таныстырыў, баслы лингвистикалық терминлер бойынша түсиниклер бериў, лингвистикалық бақлаў ҳәм лингвистикалық анализдиң дәслепки көнликпелерин қәлиплестириў мақсетинде "Тил билимине кириспе" курсы алып барылады. Бул пәнниң тийкарғы ўазыйпалары тилдиң жәмийетлик қубылыс екенлиги, оның раўажланыў нызамлылықлары, тилдиң пайда болыўы туўралы теориялар, тил системасы, тил билиминиң тийкарғы тараўлары -фонетика ҳәм фонология, жазыў ҳәм оның тарийхы, лексикология ҳәм лексикография, морфология ҳәм синтаксис, дүнья тиллериниң типологиялық ҳәм генеологиялық классификациялары, тийкарғы тил семьялары бойынша дәслепки мағлыўматлар бериў болып есапланады. "Улыўма тил билими" курсы филология факультетиниң питкериўши курсларында алып барылады. Бул курста "Тил билимине кириспе" пәнинде басланғыш мағлыўмат берилген темалар тереңлестирип үйретиледи. Сондай-ақ, тил теориясы, тилди үйрениў методлары бул курстың тийкарғы изертлеў обьекти болып табылады. Ал "Лингвистика тарийхы" курсы Қарақалпақ мәмлекетлик университети магистратура бөлиминиң "лингвистика" қәнигелигинде алып барылады.