Ushbu uslubiy qo`llanma toksikologik kimyo fani bo`yicha O`zR SSV va OO`MTV tomonidan tasdiqlangan namunaviy dastur asosida tuzilgan bo`lib, Toshkеnt farmatsеvtika instituti, farmatsevtlar malakasini oshirish fakultеti, “Sud kimyogar” mutaxassisligi bo`yicha ixtisoslashtirish kursi tinglovchilari bilan laboratoriya mashg`ulotlar olib borish uchun yozilgan. Unda reaktivlar tozaligi, ashyoviy dalillarni dastlabki tеkshirish va biologik ob’yеktdan suv bug`i yordamida ajratib olinadigan narkotik, zaharli va kuchli ta’sir qiluvchi moddalar, shuningdеk ashyoviy dalillar tarkibidan narkotik, zaharli va kuchli ta’sir etuvchi moddalarni qutbli erituvchilar (nordonlashtirilgan spirt va nordonlashtirilgan suv) yordamida ajratib olish, ajralmalarni tozalash va tahlilini amalga oshirishga bag`ishlangan. Ayni guruh moddalar “Organik zaharlar” deb nomlanib tibbiyotda keng qo`llanilishi va ayrimlarini tabiiy sharoitda uchrashi bu moddalar bilan zaharlanishga olib keladi. O`zbekiston Respublikasi Sog`liqni saqlash vazirligining buyruq va qarorlariga asosan to`liq sud kimyosi tahlilini olib borishda suv bug`i yordamida ajratib olinadigan zaharli moddalardan 13 ta va ob’yektlar tarkibidan qutbli erituvchilar yordamida ajratib olinadigan 28 ta zaharli moddalarni o`rganishga mo`ljallangan.
O`quv - uslubiy qo`llanma kimyo toksikologik moddalarni tahlil qilish, 259 soatlik laboratoriya mashg`uloti uchun tuzilgan.