Bolalarda olib borilgan antibakterial terapiyani xavfsizligini ta`minlash

Hozirgi zamon shifokori mikroblarga qarshi yuzdan ortiq dori vositalari haqida ma’lumotga ega. Shifokorning asosiy vazifasi o`z vaqtida olib borilayotgan farmakoterapiyaning samaradorligini nazorat qilish va xavfsizligini ta’minlashdan iborat. Ma’lumki, shifokorlar tomonidan buyurilgan antibiotiklarning 60- 80 % asoslanmagan holda qo`llanilishi kuzatiladi. Ko`pincha respirator virusli infeksiyalarda ham anitibakterial preparatlar qo`llaniladi. Asossiz qo`llanilgan antibiotiklar birinchidan –samarasiz, ikkinchidan – nojo`ya ta`sirlarning kelib chiqish ehtimolini ortishiga olib keladi. Noto`g`ri tanlab buyurilgan antibiotikning samarasi ko`rinmaydi va shifokor bu holatni mikroorganizmlar chidamliligini yuqori hisoblab, rezerv antibiotik moddalardan buyura boshlaydi. Antibakterial preparatlarni tanlab buyurishda asosan bakteriologik tekshirishlar natijalariga va ajratib olingan kultura shtammlarini antibiotiklarga ta’sirchanligini aniqlab tanlash kerak. Undan tashqari, preparat tanlashda organizmning o`ziga hos hususiyatlarini, ya’ni bemorning yoshi, eliminatsiya a’zolarining holati, allergo anamnezlar pediatriyada katta ahamiyatga ega, masalan, chaqaloqlardagi jigar glyukuroniltransferazasining nisbatan yetishmovchiligi natijasida organizmda levomitsetinning to`planishiga sabab bo`lib, keyinchalik o`tkir yurak yetishmovchiligiga olib keladi, sulfanilamidlar chaqaloqlarda bilirubin almashinuvini buzadi, tetratsiklinlar suyak to`qimasida to`planib, bolalarda skeletni o`sishiga to`sqinlik qiladi.