XXI asr, yangi texnika va texnologiyalarni kompyuterlar asosida ishlab chiqish va tashkil qilish asri xisoblanadi. Shuning uchun barcha sohalar kabi muhandislik loyihalashda ham kompyuterlardan foydalanish hozirgi kunning dolzarb muammolaridan biri hisoblanadi. Shu munosabat bilan muhandislik ta’lim yo’nalishlarida “Loyihalash jarayonlarini avtomatlashtirish asoslari” fani kiritilgan. Ushbu uslubiy qo’llanmada loyihalash jarayonlarini avtomatlashtirish asoslari fanining bir qismi AutoCAD grafik dasturi asosida bayon qilingan.
Autodesk kompaniyasining AutoCad tizimi hozirgi davrda avtomatik loyihalashning xalqaro standarti hisoblanadi. AutoCAD dasturining yaratilganligiga 20 yildan oshgan bo’lsada, avtomatik loyihalash dasturlari orasida hanuzgacha yetakchi o’rinni egallab kelmoqda. Chunki AutoCAD dasturi mukammal va ommabop dastur bo’lib, u har qandy turdagi sxema va chizmalarni yaratishni yuqori aniqlikda va sifatli bajaradi. Shuningdek, mazkur dasturdan foydalanuvchilarning ijodiy imkoniyatlarini to’la amalga oshirishga yordam beradi. Shu sababli, millionlab mutaxassislar, olimlar, muhandis – texniklar va talabalar loyihalash ishlarini avtomatlashtirish sohalarida AutoCAD tizimidan foydalanishlari ommalashib bormoqda. Bunga asosiy sabablardan yana biri AutoCAD tizimini loyihalash bo’yicha xalqaro standart sifatida qabul qilinganligidir. Hozirgi kunda jahon bo’yicha AutoCAD tizimidan foydalanuvchilarning umumiy soni 20 milliondan ortiqni tashkil etadi.