Ўзбек халқининг истиқболдаги асосий мақсади инсонпарвар, демократик ҳуқуқий давлатни ва фуқаролик жамиятини бунёд этишга қаратилган бўлиб, бу борада жамиятнинг барча соҳаларида тубдан янгиланишлар ва бунёдкорлик ишлари амалга оширилмоқда.
Шуни айтиш керакки, ҳуқуқий давлат ўз-ўзидан бунёд бўлмайди. Бунинг учун ҳаётда Конституция ва қонунларнинг устуворлиги таъминланиши ҳамда юксак ҳуқуқий онг ва ҳуқуқий маданиятнинг қарор топиши зарур. Чунки Конституция давлатни давлат, миллатни миллат сифатида дунёга танитадиган олий юридик кучга эга ҳуқуқий ҳужжатдир.
Конституция халқимизнинг ҳоҳиш иродасини, адолатли давлат, фаровон жамият ва эркин ҳаёт қуриш ва уни ривожлантиришнинг истиқболларини белгилайди. Унда инсон ҳаёти, унинг шаъни, қадр-қиммати, ҳақ-ҳуқуқлари ва бошқа манфаатлари олий қадрият сифатида мустаҳкамлаб қўйилган.