Мавзунинг долзарблиги. Муҳаммад Сиддиқ Залилий XVIII аср уйғур адабиётининг кўп асрлик туркий шеърият анъаналарини муносиб давом эттирган йирик намояндаларидан. Шоир асарларини илк манбалар асосида ўрганиш, унинг туркий адабиёт тарихида тутган ўрнини белгилаш, асарларининг қиёсий-матний тадқиқини амалга ошириш адабиётшуносликнинг, унинг таркибий қисми бўлган адабий манбашунослик ва матншуносликнинг долзарб вазифаларидандир.
Залилий адабий меросини чуқур ўрганиш Машраб (1640-1711), Ҳувайдо (1704-1780) каби у билан замондош ижодкорлар ҳаёти ва ижодига доир баъзи муаммоларни аниқлашда ҳам катта аҳамиятга эга. Чунки бу уч шоир яшаган ижтимоий-сиёсий муҳит макон ва замон нуқтаи назаридан ўзаро яқиндир.