O’quv-uslubiy qo’llanma 5 kurs talabalarining laboratoriya darslariga mustaqil tayyorlanishlari va tajribalarni bajarishlari uchun mo’ljallangan. Ushbu o’quv-uslubiy qo’llanma talabalarning mavzu yuzasidan olgan nazariy bilimlarini mustahkamlab, ko’nikmalarini shakllantirishga yordam beradi. Bunda talabalar sanoatda ishlab chiqariladigan dori turlarini sifatini nazorat etish va standartlashda qo’llaniladigan MTH lar, ularda keltirilgan talablar, zamonaviy tahlil usullari va ularning o’ziga xos tomonlarini chuqur o’rganadilar.
Mavzuning ahamiyati:
Hozirgi kunda sanoatda ishlab chiqarilgan dori vositalari dorixona retsepturasining 95% dan oshig’ini tashkil etib, ularning ishlatilishi yanada oshib bormoqda. Bu o’z navbatida sanoatda ishlab chiqariladigan dori vositalarining sifatiga qo’yilgan talabning kuchayishiga olib keldi. Shunga ko’ra talabalarni sanoatda ishlab chiqariladigan dori vositalarining davlat standartlari asosida tahlil qilib, sifatini nazorat qilish va standartlash jarayoni bilan tanishishi muhim ahamiyat kasb etadi.