Бозор иқтисодиёти ташкилот ва корхоналарга ўзининг бир қанча талабларини қўяди. Юқори фойда олиш ва шу билан биргаликда жамият манфаатларига хизмат қилиш, шунингдек юқори рақобат шароитида яшаб қолиш учун корхона, ташкилотлар ҳозирги замон иқтисодиётининг ажралмас қисми ҳисобланган менежмент ва маркетинг қонунлари асосида фаолият кўрсатишлари лозим. Республикамиздаги фармацевтик маҳсулотлар бозори маълум бир даражада тўйинганлиги шароитида фармация саноати корхоналари ҳам бундан мустасно эмас. Маркетингни бошқариш – маркетинг фаолиятини амалга ошириш учун зарур бўлган барча моддий, молиявий, меъёрий ва бошқа ресурсларининг мажмуи бўлиб, уни амалга ошириш жараёнида барча ходимлар фаолиятини бир мақсадга йўналтириш, уюштириш ва мувофиқлиштиришдир. Бунда иқтисодий, техникавий ва бошқа қонунлардан онгли равишда фойданилади. Бу фаолият маркетологлардан ниҳоятда катта билим, шижоат ва туганмас меҳнат талаб қилувчи мураккаб тизимдир. Унинг мураккаблиги доимий ривожланиб, ўзгариб боришда, жуда кўп майда муайян бўлаклар (элементлар) қисмчалардан тузилганлигидадир. Маркетингни бошқариш тизимининг таркибий қисмлари: мақсад тамойиллари, вазифалари, ташкилий тузилиши, усуллари, бошқаришнинг техника ва технологияси, кадрлар ва бошқалардан иборат. Унинг ташкилий тузилиши мезон ва мақсади деганда, маркетингнинг таркибий тузилишининг динамик барқарорлиги, эволюция ўзгаришлари ва ташқи муҳит билан қўйган мақсади билан белгиланади.