Жамият ҳаётининг турли соҳалари орасидаги интеграциянинг кучайиши ҳозирги даврнинг муҳим хусусиятларидан бири саналади. Интеграция ХХ асрнинг охири ХХI асрнинг бошида энг универсал, оммавий ва кенг қамровли жараёнга айланди. Айни чоғда у ижтимоий, сиёсий, ҳуқуқий ва маънавий соҳаларни қамраб олди. Дин ва санъат, хусусан, ислом қадриятлари билан тасвирий санъатнинг интеграцияси ҳам ўз қонуниятлари ва тамойилларини намоён қилаётган объектив ҳодиса сифатида реал воқеликка айланди. Ушбу жараёнларнинг чуқур фалсафий таҳлили комил инсон тарбиясида муҳим аҳамият касб этади.