Ha’r qanday a’debiy tildin’ tariyxi’nda, woni’n’ qa’liplesiwinde ko’rkem so’z sheberleri - shayi’rlar ha’m jazi’wshi’lar belgili xi’zmet atqaradi’. Wolardi’n’ ayri’mlari’ wo’z shi’g’armalari’ menen a’debiy tildegi normalardi’n’ qa’liplesiwine jan’a bag’dar beredi, oni’ jetilistiredi. Sonli’qtan da qa’legen jazi’wshi’ yamasa shayi’r hi’g’armalari’ni’n’ tilin, woni’n’ basqa stillerden ayi’rmashi’li’qlari’n ha’m wo’zine ta’n wo’zgesheliklerin ha’r ta’repleme u’yreniw u’lken a’hmiyetke iye. Ko’rkem a’debiyatti’n’ tili - milliy tildin’ bir bo’legi, woni’n’ ayri’qsha bir ko’rinisi, sonli’qtan woni’ milliy tilden bo’lek shi’g’ari’p taslawg’a bolmaydi’, wol til stilleri sistemasi’nda ayri’qsha ori’ng’a iye. Usi’g’an baylani’sli’ ko’rkem shi’g’armani’n’ tilin u’yreniw de ha’r qi’yli’ boladi’.