O`spirim jasinda psixikaliq rawajlaniw mashqalalarin korrektsiyalawdın` o`zine ta`nligi

O’spirimlik jasi o’zinin’ ko’pshilik ta’repleri menen psixologiyaliq ko’z qarastan ju’da’ qiziqli da, o’zine ta’n o’zgeshelikleri menen oqiw ha’m ta’rbiya jumisinda o’zinshelik qiyinshiliq ha’m ko’plegen mu’mkinshiliklerdi de tuwdiratug’in da’wir. Bul da’wirdi psixologiyada burilis (perelomniy period) da’wiri yamasa o’tiw da’wiri dep te ju’rgiziledi. Sebebi bala bul da’wirge kelip balaliqtan, eseye baslawg’a, erjete baslag’anliq belgilerin ko’rsetiwshi, u’lkenler qatarina qosiliwdin’ ko’rinis sipatlarin o’zlerinde payda etetug’in da’wir bolip, onin’ psixikasinda anag’urlim da’rejede psixikaliq o’zgeris, jan’alaniw, qayta du’zile baslaw tezlesedi, adamlar menen qarim-qatnasinda, o’z-o’zin bahalawinda, basqalarg’a o’zin salistiriwinda, u’lkenlerdin’ olardin’ basqariwina qanday qatnas jasawinda u’lken o’zgerisler da’wiri esaplanadi.