Яқин тарихимизда жамиятда чирмовиқдай кенг тарқалган иллатлар халқимизнинг тинкасини қуритган эди. Асардаги воқеалар асосан мустабид шўро тузуми даврида бўлиб ўтади. Омонулла образини Хўжа Насриддин, Алдаркўса, Остап Бендер, Юрий Деточкин ва Хлестаковларга қиёслаш мумкин. Баъзи характерли жиҳатлари улардан-да ошиб тушади. Бош қаҳрамон тазарру қилган "Тавба"ни ўқир экансиз, Сиз ҳам беихтиёр ҳаяжон билан "Тавба!" деб қўйсангиз ажабмас. Чунки Омонуллага ўхшаган шахслар ҳозир ҳам учраб туради.