Инсоннинг ҳар томонлама уйғун камол топиши ва фаровонлиги, шахс манфаатларини рўёбга чиқариш шароитлари ва таъсирчан механизмларини яратиш, эскича тафаккур ва ижтимоий хулқ-атворнинг андозаларини ўзгартириш мамлакатимизда амалга оширилаётган ислоҳотларнинг асосий мақсади ва ҳаракатлантирувчи кучидир. Халқимизнинг бой маданияти, ривожланаётган иқтисодиёти, фан-техника ва технология соҳасида эришилган ютуқлар асосида кадрлар тайёрлашнинг мукаммал тизимини шаклантириш Ўзбекистон тараққиётининг муҳим шартидир.